الصفحة الرئيسية مقالات أشرف حمدي يكتب: إزاي تعمل أكاونت fake على فيسبوك؟

أشرف حمدي يكتب: إزاي تعمل أكاونت fake على فيسبوك؟

100

عشان تعمل أكاونت fake لازم الأول تجيب ورقة وقلم كده وتحدد ملامح الشخصية

1- الجنس (النوع) والسن والاسم
2- الوظيفة و الدراسة
3- المنشأ .. اتربى فين الجدع ده؟
4- قصة حياة الشخصية بقى من ساعة ما اتولدت ولحد دلوقتي. حتى لو مش حتعرض اي حاجة من القصة دي .. لكن قصة الشخصية في الماضي هي اللي بتحدد ملامحها دلوقتي وفي المستقبل (مع الحاجات التلاتة اللي فاتت دول) وطريقة الكلام وأسلوبها في التعامل مع الناس وطريقة التفكير و و و

بعد كده حضرتك تبدأ في مرحلة تنفيذ الشخصية من الورق ده على هيئة بروفايل.

وفقا لما سبق بقى املى خانات الـ about

بالنسبة للصور اياك تجيب صور ناس تانية لإنهم حيتعرفوا وحتلاقي صاحب الصورة نطلك وقالك “خد تعالى هنا ياض” .. وماتجيبش صور من على جوجل عشان بتتفقس في السيرش بالصور .. مافيش قدامك غير صور دبابيب وقطط وقلوب بس ده بيقلل من مصداقية البروفايل خلي بالك. لو قدرت تعتر في البوم صور لشخص مالهوش اي علاقة بالفيس ولا رافع صوره اونلاين يبقى ده كنزك.

لو حتتقمص شخصية حد مشهور يبقى لازم تعرف كل حاجة عنه ولازم مايكونش البروفايل بتاعه verified وياسلام لو مالهوش اكاونت ع الفيس اصلا وهنا بقى ممكن تستخدم صور نادرة ليه ومش منتشرة وتقدر ساعتها تضيف فنانين بجد عندك في قائمة الفريندز وبالتالي بروفايلك يبقى تقيل ويتصدق. بس خلي بالك ان الأكاونت ده عمره حيكون قصير ومش حيعمّر معاك لإن الشخص الحقيقي كده كده حياخد خبر ويحذر الناس.

اكتب بقى بوستات كتير بشكل دوري على لسان الشخصية اللي انت اخترعتها، ولازم تعرف هي بتفكر إزاي وبتتكلم إزاي .. اسلوب الكتابة نفسه لازم يكون ثابت وياسلام لو فيه تعبيرات معينة مميزة وستيكرات وايموشنات ثابتة.

كوّن بقى دائرة من المعارف والأصدقاء على الفيس وخلي فيه تفاعل وحوار قدام الناس.

اوعى تغلط واوعي يكون فيه تناقض بين اللي بتكتبه او اللي بتعمله مع ملامح الشخصية اللي انت رسمتها دي.

مافيش واحدة خريجة جامعة أمريكية ساكنة في صفط اللبن وبتشير بوستات تألمت فتعلمت بتاعة أسير الأحزان وبتسمع مهرجان فرتكة فرتكة.

ومافيش واحد عنده 19 سنة متجوز من 6 سنين وعنده 4 عيال.

ومافيش واحد بيضحك كده هاهاهاهاهاهاهاها وساعات يضحك كده هههههههههههه

ومافيش طبعا واحد بيقول : “انا شايفة” … أو واحدة بتقول : “انا عارف إن” … إلخ غلطات صغيرة ولكن قاتلة.

لو قدرت بقى تعمل كووول اللي فات ده وتبذل كل المجهود الرهيب ده وتصبر بالشهور وقدرت تحبك الدور كويس وتلتزم بيه وتكوّن قائمة اصدقاء كبيرة كلهم مقتنعين انك بجد فعلا فأنا شايف انك المفروض تسيب فبركة البروفايلات والكلام الفارغ ده للعيال الهايفة وتدرس سيناريو لإنك مشروع سيناريست أو روائي هااااايل.

لإن كل اللي انا قلته فوق ده هو قواعد بناء الشخصية.

والله الموفق 🙂

لينك المقال على حساب دكتور أشرف حمدي: http://bit.ly/ashrafhamdy

التعليقات:

أشرف حمدي

رسام كاريكاتير مصري، ومؤسس قناة إيجيبتون للرسوم المتحركة على يوتيوب.

المزيد بواسطة أشرف حمدي
المزيد من مقالات