الصفحة الرئيسية نصائح فيديو.. كيف تستعيد هاتف الـ “آي فون” بعد سرقته؟

فيديو.. كيف تستعيد هاتف الـ “آي فون” بعد سرقته؟

3
1
2,094
iphone4

ستبدأ الآن بقراءة تجربة حقيقية حدثت بالفعل لحالة سرقة جهاز آي فون، القصة طويلة لكنك فى النهاية ستجد خلاصة جيدة لتجربة إستعادة هاتف بعد سرقته ، قررت أكتب تفاصيلها حتي لا يصطدم الآخرين بنفس المطبات اللي إصطدمت بها قبل إستعادة جهاز الآي فون، القصة مكتوبه بإسلوب ساخر لشعوري أنه الإسلوب الأنسب لسرد تفاصيل التجربة، و ستشاهد بجانب ذلك فيديو يوضح أكثر إمكانيات الآي فون التي تبهر اللص بعد تجربته للهاتف لأول مرة، و هذا الفيديو صور عن طريق الخطأ من خلال سارق الجهاز، وتم إكتشافه علي الجهاز بعد إستعادته.

المكان: مطار القاهرة

الزمان: الساعة السادسة و النص مساءً

الفصل الأول: أجرة التاكسي موبايل أي فون.

– راجع من السفر و بدور في المطار علي تاكسي

– عذاب السنين علشان ألاقي سواق تاكسي مشغل العداد، و بعد نقاش حاد مع السواقين قاطعنا صوت سواق بيقولي “يا بيه إركب العداد شغال”

– طبعاً إعتبرت السواق ده منقذي من الصفقات الإجبارية اللى كان السواقين بيحاولوا يفرضوها عليا.

– قعدت علي يمين السواق و إنشغلت فى الطريق بعمل كام إتصال تليفوني من تليفوني الأي فون.

– وصلت الحمدلله لحد باب العمارة بعد حوالي 45 دقيقة مدة الطريق من المطار للبيت.

– فتحت باب الشقة و حطيت الشنط.. و قلعت الجاكت و…

لحظة..

الموبايل فين..

فضيت كل جيوبي و مفيش موبايل؟!!!!

– إفتكرت آخر لحظة كنت ماسك فيها الموبايل كانت إمتي.. لما قربت من البيت طلعت الفلوس من جيبي علشان أحاسب السواق و علشان أعد الفلوس.. سبت الموبايل علي الكرسي.. و حاسبت السواق و نزلت و أنا سايبله هديه علي الكرسي عباره عن جهاز آي فون… “حاسس ببوادر أزمة قلبيه”.

– نزلت جري لباب العمارة علي أمل إنه يكون لسه مامشيش أو يكون إبن حلال و يرجع تاني علشان يجيب الموبايل.. “ساذج قوي أنا”، و بالتأكيد كان فص ملح و داب… إيه العمل إيه العمل.. أه أتصل عليه أكيد هايرد عليا و يقولي تعالي خد الموبايل.

– “الهاتف ربما يكون مغلقاً أو خارج نطاق الخدمة”.. ده كان الصوت اللي رد عليا لما حاولت أتصل برقمي.. يعني البيه قفل الموبايل!!!

–  الصورة بدأت تتضح.. أنا إتعلم عليا فى موبايل آي فون.. ولازم خطواتي الجاية تكون مبنيه علي إقتناعي بإني إتسرقت 🙁

الفصل الثاني: فوائد الثقافة التكنولوجية “أفضل خدمة دعم فني.. طبعا فودافون!!”

– أخيراً جه وقت اللي هاستخدم فيه خدمات أبل السحرية اللى كل الناس طالعين بيها السما.

– كل اللى معاهم آي فون دايما بيتباهوا بمميزات الموبايل ده قدام أصحابهم.. “ده لو ضاع مني أقدر أعرف هو فين علشان أجيبه تاني”.. أهو ضاع مني.. لما أشوف بقي خدمة Find My iPhone هاتعرفني الموبايل فين ولا لأ.

– فتحت موقع “www.icloud.com” علشان أدخل علي خدمة فايند ماي آي فون.. دقيقة و هاعرف السواق إبن “****” موجود فين و أطب عليه و أرجع الموبايل.

– الأيفون “Offline”.. دي الرسالة اللى ظهرلتلي لما حاولت اعرف الموبايل موجود فين.. البيه قفل الموبايل و مش هاعرف أوصله طول ما الموبايل مقفول.

– طيب الخدمة دي بتقدملي إمكانية أن أبعت للبيه الحرامي رسالة أول ما يفتح الموبايل علشان أستعطفه يرجعلي الموبايل.

– كتبت الرسالة و كمان إخترت إن الموقع يعمل للموبايل كلمة سر أول ما يفتح.. لأن بسلامتي ماكنتش عامله كلمة سر 🙁

– الحاجة الذكية الوحيدة اللى انا كنت عاملها هي إني كنت عامل الخط بتاعي بشريحتين.. لأن شرحة الأي فون مايكرو “يعني شريحة أصغر من الشرائح الموجودة فى التليفونات التانية، و كنت عامل الشريحة دى لأن دايما عندي هاجس من إن الأيفون يعطل، و ماعرفش أشغل الشريحة المايكرو سيم علي تليفون تاني.. و ساعتها أضطر أخبط مشوار لفرع فودافون.. فقلت اعمل الشريحة التانية إحتياطي.

– إتصلت من الشريحة الإحتياطي بخدمة عملاء فودافون.. و شرحت للأستاذ اللى رد عليا الموقف، قلتله “الشريحة اللى بكلمك منها دلوقتي بقدر أتصل منها بس و مش بتستقبل مكالمات و الشريحة اللي في التليفون المسروق هيه اللى بتستقبل و بترسل.. أنا عايزك تقفل الشريحة اللى مع الحرامي و تخلي الشريحة الى معايا هي الشريحة الوحيدة للخط”.

بصراحة الراجل تفهم الموقف و رد و قالي “طيب يا افندم أنا هاحتاج من حضرتك تقولي رقم الشريحة اللى بتتكلم منها دلوقتى علشان”.

قولتله “معرفش الشريحة فى التليفون مش هاعرف أقولك رقمها دلوقتي”

قال “طيب يا أفندم أنا هاقفل معاك دلوقتي و هارجع أكلمك كمان دقيقة واحدة تكون شفت رقم الشريحة”!!.

– قفلنا الخط.. فكيت الشريحة و عرفت الرقم و ركبتها تاني.

– تمر أكثر من دقيقة و البيه ما إتصلش.. “مــــا إتصلــــــــش” هايتصل إزاااااااااااااااااي و الشريحة اللى بكلمة منها بتصل بس و مش بتستقبل.. أنا غبييييييييييييييييييييي.. و لجأت لشركة مشغلة واحد أغبي علشان يساعدني.

– إتصلت تاني بالشركة و أنا حرارتي 40 من الغيظ.. شرحت للأستاذ اللي رد عليا و فهم اللى حصل و قالي بثقة “يا أفندم ولا يهمك ثانية واحدة و أنفذلك طلبك”.. حسيت براحة نفسية شوية و بدأ صوتي يهدي و أنا بقوله بيانات حسابي الشخصية علشان يتأكد منها.. و فجأة.. الخط قطع!!!!!

– بقيت بكلم نفسي.. مش وقته خالص الشبكة تقطع دلوقتي، حاولت أتصل برقم خدمة العملاء تاني.. لكن رسالة علي الموبايل ظهرتلي معناها إن الشريحة اللى بتكلم منها موقوفة!!!!!!!!!!!.. الأستااااااااااااااذ وقفلي الشريحة بتاعتي.. و شغل الشريحة التانية للحرامي.. أه يا ولاد $%&%$&%$&%^#$^%$@#^%#^.

–  نزلت من البيت بالشبشب بكلم نفسي.. و عايز أنفجر في أي حد يقابلني.. عشر دقائق و كنت فى فرع فودافون فيصل و أودامي أنسة سمراء بتقولي ” تحت أمرك يا أفندم”، و بدون مقدمات طلعلتلها البطاقة و قولتلها “رقمي كذا كذا و موبايل إتسرق و أنا معايا شريحة بديلة و عايزها تبقي هيه الأساسية و ألغي التانية”

ردت عليا بكل هدوء “ثانية واحدة يا أفندم أعمل “إتشيك”.. أيوة يا أفندم بس حضرتك الشريحة اللى معاك دي هي اللى مسروقة لأن دي الشريحة الملغية علي السيستم زي ما هو ظاهر أودامي”

–  هنا بقي إنفجرت أكيد يا أنسة هاتبقي ملغية لأن البيه الذكي اللى في خدمة العملاء قفل الخط عليا و فتحه للحرامي.. و لو سمحت البطاقة بتاعتي قدامك.. و أرجوكي إقفلي الخط اللى مع البيه اللى سرق الموبايل و شغليلي الخط بتاعي.. حالاً 

– ردت عليا البنت و هيه بتحاول بصعوبة إنها ماتضحكش عليا و أنا في قمة غضبي ” أنا بتأسف لحضرتك يا أفندم و حالاً هاشغلك الخط”.. و تبص للشاشة علشان تنفذ اللى طلبته منها.. فجأة تكلم زميلها اللى جنبها بكل هدووووووووووووء و بكل لامبالاه “معلهش أنت أقدم مني ممكن تقولي ألاقي الشاشة بتاعة المالتي سيم فين؟”…… قولولي إنتو كنت أعمل إيه فى الموقف ده.

– طبعاً زميلها حاول يرد عليها و باين عليه الإحراج و ده اللى خلاني ما أتلفظش بأي لفظ جارح.

– “طيب يا أفندم أنا هالغي لحضرتك الشريحتين و هاعمل لحضرتك شريحة جديدة” دة اللي البنت توصلت ليه بعد فترات تفكير و تركيز طويلة أودام شاشة الكمبيوتر.

– قولتها أرجوكي إعملي ده حالاً، و بالفعل ربنا وفقها و عرفت تعمل الشريحة و خرجت من فرع فودافون.

– دلوقتي خطي شغال و الخطوة الجاية اللى لازم أقوم بيها إني أعمل محضر فى القسم، و بدون تردد إتجهت لقسم الهرم.

الفصل الثالث: الشرطة فى خدمة الشعب

– سألت واحد ماشي في الشارع علي عنوان القسم المسئول عن منظقة أول فيصل، بصلي بخوف و قالي “مش عارف و الله بس إنت ممكن تروح قسم الهرم”.. ماشي أروح قسم الهرم.. و بعد نص ساعة كنت فى القسم بفضل السيولة المرورية طبعاً 🙁

– قابلني ظابط شرطة علي الباب و سألني داخل ليه!!، المهم حكيتله.

رد عليا “إنت لازم تجيب علبة الموبايل علشان السيريال، و تروح بيها القسم الي موجود فى المنطقة اللي حصلت فيها الواقعة”

رديت “يا أفندم انا نسيته فى تاكسي، يعني المنطقة اللي حصلت فيها الواقعة متنقلة، ثم أنا عايز أعمل محضر علشان أتتبع الموبايل علشان أوصل للي سرقة، و دي عمليه ما أعتقدش إنها محتاجة أروح أدور علي القسم اليى حصل فيها الواقعة”.

يرد عليا بكل لامبالة “و الله أنا قلتلك المطلوب، عايز تدخل و تسمع نفس الرد براحتك”

– ركبت العربية و إجهت للبيت علشان أجيب علبة الموبايل، بعد ما دخلت للظابط اللي في قسم الهرم و سمعت نفس الكلام.

–  بعد ساعة من المشاوير و السؤال عن القسم اللي أنا أتبع له، و بعد شرح مطول للظابط اللي إستقبلني بكل إحترام رد عليا و قالي “أنا هاعملك المحضر بس علي فكرة التتبع مش شغال حاليأ”

رديت عليه ” مش فاهم حضرتك يعني إيه مش شغال ”

رد ” يعني مش شغال.. كان زمان الكلام دة، لكن بعد ما سرقات الموبايل زادت مابقاش فيه تتبع للموبايلات غير فى الحالات الجنائية زي القتل و الخطف و كده، ولما بيجيلنا حد زي سعادتك بنعمله المحضر علشان مايزعلش، لكن فى الآخر المحضر بيتحفظ”.

و سكت ثواني و قالي ” بص أنا عاعملت المحضر و إنت اللي عليك إنك تتابعه عند وكيل النيابة.. علشان يخرجوا من الحفظ، لأن لو ماتابعتش المحضر هايعرفوا إنك مش مهتم و مش هايعلموا حاجة فى المحضر”.

– طبعا ماكنش أودامي غير إني أوافق علي إقتراحه، و عملت المحضر اللي مالوش لازمه.. و خرجت من القسم و أنا بستعوض ربنا فى الموبايل و في الداتا المهمة اللي عليه.

الفصل الرابع و الأخير: إبحث مع كرومبو

– خرجت من القسم و إتصلت بصديق ليا والده بيشتغل فى المطار، و بعد ما عرف الحكاية إقترح عليا أروح المطار و أبلغ فى نقطة شرطة المطار، لأنهم بيسجلوا أرقام التاكسي فى الدخول و الخروج من المطار، و بما إن سعادتي ماكنش معايا رقم العربية و كل اللي أعرفة عن السواق هو شكله و نوع عربيته الفيرنا، فكان توقع إي نتيجه من مشوار مطار ما هو إلا تفاؤل ساذج مالوش أي لازمة.

– و برغم إرهاق يوم السفر الطويل.. قررت أتجه للمطار “” و فيها إيه.. ما هي خسرانه خسرانه”.

– وصلت مدخل المطار و قفت عند أول عربية شرطة قابلني، و بسأل العسكري اللي واقف “نقطة شرطة المطار فين لو سمحت؟”

يرد بعد تفكير “مش عارف و الله.. متهيألي مفيش هنا”.. خرجلي ظابط من العربية و دلني علي المكان، لكن و أنا فى طريقي خطر فى بالي أروح للمكان اللى ركبت فيه التاكسي.. يمكن أوصل لحاجة.

– وصلت هناك حوالي الساعة 12 و ربع بعد منتصف الليل.. المكان بقي فاضي من التاكسيات تقريباً إلا من بعض العربيات المصفوفة فى إنتظار وصول الركاب، و بالصدفة أعدي جنب واحد إفتكرته فى الأول سواق تاكسي، لكن جهاز اللاسلكي المعلق في جيبه خلاني أعتقد إنه من رجال الأمن فى المطار، فقررت أسأله ” هو حضرتك من أمن المطار “

رد ” أيوه انا مسئول الشرطة هنا.. خير في إيه “……. و بعد سرد كل الحكاية من طقطق لسلامو عليكوا.. حسيت إن الراجل بدأ يتقمص دور “كرومبو”، و سألني عن شكل السواق و نوع العربية، و بعد ما قلتله كل المعلومات اللى عندي.. رد عليا بكل ثقة ” ماتقلقش يا باشا موبايلك هايرجعلك و دلوقتي”.

– رفضت طبعاً أدي لنفسي أي أمل، و حسيت إن الراجل بيحاول يعمل شو قدام السواقين اللي واقفين و سمعوا مني الحكاية، و اللي مابخلوش عليا بكل أنواع التأنيب لأني رفضت أركب التاكسي اللي من غير عداد، و بدأ كل واحد منهم يعددلي فوائد التاكسي اللى من غير عداد، و اللي أهمها إنك مهما تكون نسيت إيه فى العربية، تأكد إنه الحاجة دي هاترجع.

– و بعد ما الأمين تأكد إن السواقين إستلموني بما فيه الكفاية، طلب مني أدخل معاه صالة الوصول فى المطار علي أمل إني أشوف السواق واقف هناك.

– طبعا ماكنش موجود و دخلنا صالة الوصول و السواقين اللي كانوا واقفين هناك إستلموني هما كمان زي اللى قبلهم.. طبعاً حقهم لكن الكلام دة ماكنش فارق معايا، و كان عندي فضول أعرف الأمين ده كلامنجي ولا مسيطر فعلا فى المطار زي ما قالي.

– خرجت مع أمين الشرطة من صالة الوصول، و وقفت معاه مع سواق تاكسي من اللي بيسموهم “خطافين” (يعني السواقين اللي بيدخلوا المطار علشان يوصلوا الركاب، و ياخدوا ركاب من المطار و هما خارجين، وده بيعتبروا السواقين المسجلين فى المطار “خطف” علي حد تعبيرهم، و من هنا جاء إسم الخطافين)، و بعد نقاش طويل بين الأمين و السواق حول مواصفات السواق اللى أنا قلت عليها، بهدف طرح أسماء أكثر السواقين اللى ينطبق عليهم الأوصاف دي.

– المهم إنطبقت الأوصاف علي إتنين، منهم واحد تم إستبعاده من قبل السواق لأن “إبن ناس و إستحالة يعمل كده” علي حد تعبيره.

– طلب الأمين من السواق إنه يتصل بيهم و يطلب منهم مقابلته، علشان اتعرف عليهم، و بالفعل وصل السواق الأول ” إبن الناس”، و بالفعل طلع “إبن ناس” و ماكنش هو اللى انا ركبت معاه، أما التاني فإتصل السواق بيه و طلب منه يقابله فى المطار الجديد، بعد ما عرف منه إنه موجود فى المطار القديم.

– فى البداية رفض السواق المتهم إنه يتقابل مع صاحبه فى المطار الجديد، لكنه وافق بعد ما أغراه بوجود ناس مسافره و عايزين تاكسي بعداد، و خلال ربع ساعة، كان السواق أودامنا… و كان هو السواق اللي بندور عليه.

– فى الأول حسيت إني غلطان و إنه مش هو السواق اللى بدور عليه، لكنه إختصر عليا طريق التفكير، و قالي أول ما شافني واقف مع أمين الشرطة ” إنت فين يا أستاذ، دا أنا بدور عليك علشان من ساعة ما لقيت التليفون”!!!! ردوا عليه إنتو بقي 🙂

مواقف و طرائف أخري:

1- بعد ما شغلت خط التليفون و أنا فى طريقي لقسم شرطة الهرم فوجئت برقم خدمة عملاء فودافون بيرن عليا.. و المتصل كان مسئول خدمة العملاء الذكي اللي قفل عليا الخط بدل ما يقفله علي السواق اللي أخد التليفون، و طبعا أخد اللى فيه النصيب، و بعد إعتذارات السنين بلغني إنه عملي خصم علي الفاتورة الجاية 50 جنيه علي سبيل الإعتذار عن الموقف اللى حصل.

2- المفروض إني أرسلت أمر من خلال خدمة “فايند آي فون” بعمل كلمة سر للموبايل.. لكن بعد ما فتحت الموبايل و قمت بتفعيل الإنترنت عليه، كان من المفترض تنفيذ الأوامر المرسلة.. لكن هذا المفترض ماحصلش.

3- بعد ما وصلت البيت و أنا مش مصدق إن الموبايل رجع، بفتح الموبايل.. لقيت الأخ السواق مسجل فيديو لنفسه هو و واحد صاحبه.. و الظاهر إنهم كانوا بيجربوا كاميرا الموبايل و سجلوا لنفسهم بالغلط، و واضح من كلامهم إعاجبهم الشديد بجودة الكاميرا.. بالإضافة لبعض الشتيمة فيا “مش عارف ليه”.. يمكن علشان مانسيتش الشاحن مع التليفون.. و دة الفيديو اللي صوره السواق و صاحبه بدون قصد.

 

 

الدروس المستفادة من رحلة البحث:

1- لو تليفونك ضاع إنسي إن الشرطة هاتساعدك فى العثور عليه… إلا إذا كنت إستخدمته فى جريمة قتل، ساعتها هاتكون فرص العثور عليه قويه جداً.

2- مابنصحش مستخدمي الآي فون بالثقة الكاملة فى تطبيق “فايند آي فون” و الإعتماد عليه فى حالة ضياع الأيفون، لكنه يعتبر أضعف الإيمان، بعد إكتشاف حقيقة عدم تتبع الشرطة لأجهزة الموبايل المفقودة.

3- الحقيقة الثالثة و الأخيرة هي بالطبع إن فودافون عندها أذكي خدمة عملاء فى مصر 🙂

محمد أبو السعود

مهندس مصري وصحفي متخصص في مجال التقنية ومؤسس موقع ويب ماستر

المزيد من الموضوعات المتعلقة
المزيد بواسطة محمد أبو السعود
المزيد من نصائح

3 تعليقات

  1. Ahmed Hossam

    21/09/2012 في 7:01 م

    يعنى الجلاكسى مش راجع.

  2. Ahmed Elmasry

    02/10/2012 في 8:28 ص

    قصة حلوة والله تنفع فيلم قصير واسلوبك شيق خلاني اقراها للاخر.

  3. karim

    31/10/2015 في 3:28 ص

    انا لقيت ايفون ومش عارف ارجعو لصحبو اعمل ايه

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *